Portsmouth að kaupa Manuel Fernandes

Enska úrvalsdeildarliðið Portsmouth er mikið í fréttunum þessa dagana. Í dag gekk Rússinn Alexandre Gaydamak frá kaupum á félaginu og nú berast þær fregnir frá breska sjónvarpinu að félagið sé við það að ganga frá kaupum á portúgalska miðjumanninum Manuel Fernandes frá Benfica fyrir 10 milljónir punda.

Fernandes þessi er 21 árs gamall landsliðsmaður og er varnartengiliður sem líkt hefur verið við Claude Makelele hjá Chelsea. Hann mun nú vera staddur á Englandi þar sem hann gengst undir læknisskoðun í kjölfar þess að Benfica samþykkti kauptilboð enska félagsins í leikmanninn.