Frábær byrjun hjá Reading

Nýliðar Reading byrjuðu vel í opnunarleik sínum í ensku úrvalsdeildinni í dag, þegar liðið vann frábæran 3-2 sigur á Middlesbrough á heimavelli sínum eftir að hafa lent undir 2-0. Ívar Ingimarsson var í byrjunarliði Reading og lagði upp jöfnunarmark liðsins, en það var Leroy Lita sem skoraði sigurmark nýliðanna í upphafi síðari hálfleiks.

Arsenal náði aðeins jafntefli á nýja heimavelli sínum gegn Aston Villa. Svíinnn Olof Mellberg kom villa yfir á 53. mínútu, en Gilberto jafnaði skömmu fyrir leikslok.

West Ham lagði Charlton 3-1. Darren Bent kom Charlton í 1-0 í upphafi leiks en skömmu síðar var Djimi Traore vikið af leikvelli og Charlton því manni færri. Heimamenn gengu eftir það á lagið og tvö mörk frá Bobby Zamora og eitt frá Carlton Cole tryggðu sigurinn.

Portsmouth lagði Blackburn 3-0 með tveimur mörkum frá Kanu og einu frá Todorov - en tveimur leikmönnum Blackburn var vikið af leikvelli með rautt spjald.

Newcastle lagði Wigan 2-1 með mörkum frá Scott Parker og Shola Ameobi. Todd McCulloch skoraði mark Wigan. Loks vann Everton 2-1 sigur á nýliðum Watford með mörkum frá Andy Johnson og Mikel Arteta. Damien Francis skoraði mark Watford.