Lampard vill ljúka ferlinum hjá Chelsea

Miðjumaðurinn Frank Lampard hjá Chelsea segist vilja ljúka ferlinum hjá félaginu og segist ekki hafa áhuga á að fara til Spánar eins og er. Lampard er 28 ára gamall og á þrjú ár eftir af fimm ára samningi sem hann skrifaði undir hjá Chelsea árið 2004.

"Ég er mjög hamingjusamur hjá Chelsea í augnablikinu, hér líður mér vel og ég er umkringdur frábæru fólki. Við eigum góða möguleika á að ná góðum árangri á ókomnum árum og ég vonast til að vinna titla svo lengi sem ég held áfram að spila.

Það var stórt skref fyrir mig á ferlinum að fara til Chelsea og hér hefur mér gengið vel, svo ég hef ekki áhuga á að fara til Spánar að spila. Ég hef miklar mætur á félögum mínum í liðinu, félaginu og stuðningsmönnunum - það er orðinn partur af mér og ég vona að ég verði hérna lengi," sagði Lampard.