Mótmælir leikbanni sínu harðlega

Wayne Rooney, leikmaður Manchester United, er sagður hafa skrifað enska knattspyrnusambandinu harðort bréf þar sem hann hótar að draga úr kynningarstörfum sínum fyrir sambandið til að mótmæla þriggja leikja banninu sem hann var settur í á dögunum fyrir að fá rautt spjald í æfingaleik.

Fréttir frá Englandi í dag herma að umboðsmaður Rooney hafi ritað knattspyrnusambandinu bréf þar sem hann hótar að draga úr störfum sínum fyrir sambandið, en Rooney er líklega vinsælasti knattspyrnumaður á Bretlandseyjum í dag.

"Skjólstæðingur minn er afar vonsvikinn yfir því hvernig tekið hefur verið á þessu máli hjá enska knattspyrnusambandinu og er í kjölfarið að íhuga að draga úr umfangsmiklum kynningarstörfum sínum fyrir sambandið," sagði umboðsmaðurinn.