Hundóánægður með hugarfar leikmanna

Jose Mourinho, stjóri Chelsea, var skiljanlega ekki sáttur við sína menn eftir að þeir töpuðu 2-1 fyrir Middlesbrough í ensku úrvalsdeildinni í gær. Hann sagði liðið sem hann horfði á missa niður 1-0 forystu og tapa á síðustu tíu mínútum leiksins ekki hafa verið "Jose Mourinho lið."

"Þetta var ekki hugarfar sem ég vil sjá frá liði sem er tvöfaldur Englandsmeistari. Ég hef verið knattspyrnustjóri í sex eða sjö ár og þetta var ekki Jose Mourinho-lið. Það er ekki nóg að sýna frábæra spilamennsku og hafa á að skipa góðum leikmönnum ef hugarfarið er ekki rétt," sagði Mourinho fúll.