Thatcher í bann hjá City

Varnarmaðurinn Ben Thatcher hefur verið settur í tímabundið leikbann hjá liði sínu Manchester City og hefur verið kærður af enska knattspyrnusambandinu, fyrir líkamsárás sína á Pedro Mendes hjá Portsmouth í leik á dögunum.

Thatcher hefur frest til 12. september til að svara fyrir sig, en verður í leikbanni hjá City þangað til. Knattspyrnusambandið getur ekki breytt gula spjaldinu sem hann fékk í leiknum í rautt eftir á, en sambandið lítur þetta ljóta atvik mjög alvarlegum augum, enda er þetta eitthvert ljótasta atvik sem sést hefur í leik í ensku úrvalsdeildinni.