Andi Zidane svífur enn yfir okkur

Franska landsliðið er nú að leggja lokahönd á undirbúning sinn fyrir fyrstu tvo leiki sína í undankeppni EM 2008, en eins og allir vita verður liðið án aðalstjörnu sinnar Zinedine Zidane sem lagði skóna á hilluna eftir skrautlegt heimsmeistaramót í sumar.

"Það verður vissulega skrítið að vera án hans," sagði Louis Saha, leikmaður Manchester United og franska landsliðsins, en Frakkar mæta Georgíumönnum á laugardaginn og því næst heimsmeisturum Ítala fjórum dögum síðar - í þetta sinn án fyrirliða síns sem lét reka sig af velli í úrslitaleiknum á HM forðum.

"Við söknum Zidane mikið og hann er nú eins og vofa sem svífur yfir höfðum okkar, við hugsum mikið til hans. Hann hjálpaði okkur að gera stórkostlega hluti á HM í sumar og átti stóran þátt í að fleyta okkur alla leið í úrslitaleikinn. Liðið hafði ekki gott sjálfstraust í riðlakeppninni, en undir forystu hans náðum við að spila mjög vel í úrsláttarkeppninni. Við lærðum að spila og búa saman sem lið og urðum líkari félagsliði en landsliði á lokasprettinum. Það varð til andi í liðinu á HM sem nú lifir góðu lífi í hópnum," sagði Saha.