Beckham hefur ekki sagt sitt síðasta

Jonathan Woodgate, félagi David Beckham hjá Real Madrid, segir að dagar félaga síns hjá landsliðinu séu hvergi nærri taldir. Beckham hefur ekki verið í landsliðinu síðan hann afsalaði sér fyrirliðabandinu eftir HM og Steve McClaren tók við stjórnartaumunum.

"David Beckham á eftir að snúa aftur með landsliðinu, ég hef enga trú á öðru. Ég kynntist David vel þegar við lékum saman hjá Real Madrid á síðustu leiktíð og ég veit hve mikilvægt það er fyrir hann að spila fyrir Englands hönd. Ég er ekki frá því að hann hafi bara þurft smá tíma til að koma sér úr sviðsljósinu eftir vonbrigðin á HM, en hann er aðeins 31 árs gamall og hefur enn fullt erindi í landsliðið. Hann er sannarlega einn af 23 bestu leikmönnum Englendinga," sagði Woodgate.