Steven Gerrard er besti knattspyrnumaður heims

Peter Crouch, leikmaður Liverpool og enska landsliðsins, segist ekki í nokkrum vafa um að Steven Gerrard sé besti knattspyrnumaður heims og á ekki orð til að lýsa hrifningu sinni á fyrirliða sínum.

"Steven Gerrard hefur verið besti leikmaður í heimi í langan tíma," sagði hinn leggjalangi Crouch í samtali við Sky-sjónvarpsstöðina. "Ég man að áður en ég kom til Liverpool, hafði mér alltaf þótt hann frábær leikmaður, en eftir að ég byrjaði að æfa með honum á hverjum degi - sá ég fyrst hvað hann er ótrúlegur leikmaður.

Hann gæti spilað hvaða stöðu sem er á vellinum og látið það líta út fyrir að vera auðvelt - meira að segja stöðu markvarðar. Hann er það góður. Það er sannkölluð ánægja að vera í sama liði og hann. Rafa Benitez segir að Steven geti orðið enn betri leikmaður en hann er í dag, og það er satt best að segja skelfileg tilhugsun.

Ég hef ekki eitt neikvætt orð að segja um Steven. Hann er frábær leikmaður og drengur góður, sem strax tók mér opnum örmum þegar ég gekk í raðir Liverpool. Hann er fyrirliði liðsins og sinnir því hlutverki með sóma," sagði Crouch um félaga sinn.