Við hlæjum að Chelsea

Raymond Domenech hefur nú komið landsliðsmanninum William Gallas til varnar og segir leikmenn franska landsliðsins hlæja að yfirlýsingu sem enska úrvalsdeildarliðið Chelsea gaf út í gær, þar sem því var haldið fram að Gallas hefði hótað að skora sjálfsmark ef hann yrði látinn spila með liði Chelsea.

"Þetta eru hneykslanlegar yfirlýsingar frá Chelsea og það er fáránlegt að halda því fram að Gallas myndi fara á bak félaga sinna í liðinu. Hann er sannur stríðsmaður og frábær varnarmaður og ég held að þetta sé vandamál sem ríkir milli Arsenal og Chelsea sem komi honum ekki við. Við hjá franska landsliðinu hlæjum að svona löguðu," sagði Domenech sem er nú að leggja lokahönd á undirbúninginn fyrir leikinn gegn heimsmeisturum Ítala annað kvöld.