Hef lært mikið af Jose Mourinho

John Terry, fyrirliði Chelsea og enska landsliðsins, segir að Jose Mourinho hafi kennt sér mikið um það að vera fyrirliði þann tíma sem hann hefur verið hjá Chelsea og þessir hlutir hafi komið sér vel eftir að hann tók við fyrirliðabandinu hjá enska liðinu.

"Ég lærði margt af Jose Mourinho og eitt af því var að vera aldrei hræddur við að láta skoðanir mínar í ljós. Jose sagði mér að hika ekki við að skammast í sér þegar hann gerði mig að fyrirliða Chelsea á sínum tíma. Hann sagði mér að hlutverk mitt sem fyrirliða væri að vernda hina leikmennina og hika ekki við að standa uppi í hárinu á sér, meira að segja fyrir framan hina leikmennina.

Það hafa komið tímar hjá Chelsea þar sem ég hef þurft að stíga í milli hans og leikmanna og það má vel vera að ég þurfi að gera slíkt hið sama hjá enska landsliðinu. Hlutirnir eru aðeins öðruvísi undir stjórn Steve McClaren en þeir voru hjá Sven-Göran Eriksson, en það er alltaf mikilvægt að leikmenn standi saman sem lið," sagði Terry.