Góður sigur hjá Reading

Íslendingalið Reading nældi sér í þriðja sigur sinn í ensku úrvalsdeildinni í dag þegar liðið lagði nýliða Sheffield 2-1 á útivelli. Kevin Doyle og Seol Ki-Hyeon skoruðu mörk Reading, en Rob Hulse minnkaði muninn fyrir heimamenn. Everton og Wigan skildu jöfn 2-2 í hörkuleik þar sem Paul Scharner skoraði tvö mörk fyrir Wigan, en þeir Andy Johnson og James Beatty mörk Everton. Bolton og Middlesbrough gerðu markalaust jafntefli.

Ívar Ingimarsson spilaði allan leiktímann með Reading í dag og Brynjar Björn Gunnarsson kom inn sem varamaður á 67. mínútu.