Scholes hefur neitað mér í tvígang

Steve McClaren hefur viðurkennt að miðjumaðurinn Paul Scholes hafi tvisvar neitað tilboði sínu um að taka landsliðsskóna fram að nýju og segir leikmanninn ætla að einbeita sér að því að spila með Manchester United og sinna fjölskyldunni.

McClaren segist hafa talað við Scholes um leið og hann var ráðinn landsliðsþjálfari og svo aftur í síðustu viku. "Það var eitt af því fyrsta sem ég gerði þegar ég tók við landsliðinu. Ég hringdi í Paul og bauð honum að snúa aftur, en hann hafnaði því - rétt eins og hann gerði í síðustu viku. Ég virði ákvörðun hans og mun ekki spyrja hann aftur, en dyrnar hjá landsliðinu eru alltaf opnar fyrir Paul Scholes," sagði McClaren.