Hefur ekki í huga að taka við West Ham

Brasilíumaðurinn Luiz Felipe Scolari sendi frá sér yfirlýsingu í dag þar sem hann vísar á bug fréttum ensku blaðanna um helgina þar sem fullyrt var að hann væri inni í myndinni sem næsti knattspyrnustjóri West Ham vegna kunningsskapar síns við Kia Joorabchian, en sá er talinn vera að undirbúa yfirtökutilboð í enska félagið.

"Breska dagblaðið News of the World birti viðtal við Luiz Scolari um helgina sem aldrei átti sér stað. Viðtali þessu var síðan dreift af Reuters-fréttastofunni, en Scolari veitti aðeins eitt viðtal í síðustu viku og það var við portúgalska fjölmiðla. Það sem fram kom í frétt News of the World var tilbúningur," segir í yfirlýsingunni frá Scolari.