Myndaði hálfnakta viðskiptavini

Verslunarstjóri Intersport verslunar í Svíþjóð á yfir höfði sér eins árs fangelsi fyrir að mynda viðskiptavini sína mismunandi mikið fáklædda.

Verslunarstjórinn hafði komið fyrir eftirlitsmyndavél yfir mátunarklefum, sem mynduðu fólkið þar sem það klæddi sig úr og í, við að máta föt. Hann gaf þá skýringu á athæfinu að hann hafi verið orðinn þreyttur á búðarþjófnuðum.

Framkvæmdastjóri Intersport keðjunnar í Svíþjóð fór hörðum orðum um þetta framtak verslunarstjórans og fyrirskipaði að myndavélarnar skyldu samstundis teknar niður. Samkvæmt sænskum lögum um persónuvernd á verslunarstjórinn yfir höfði sér eins árs fangelsi.