Lauren spilar ekki fyrir áramót

Arsene Wenger knattspyrnustjóri segir að bakvörðurinn Lauren verði líklega ekki með liði Arsenal á ný fyrr en á nýju ári, en þessi fyrrum kamerúnski landsliðsmaður hefur ekki komið við sögu hjá Lundúnaliðinu síðan í janúar vegna hnémeiðsla.

"Ég á ekki von á því að sjá Lauren fyrr en í janúar á næsta ári. Hann spilaði þjáður mjög lengi og fyrir vikið urðu hnémeiðsli hans alvarlegri en ella. Hann verður því nokkuð lengi frá vegna þessa, en hann er seigur strákur sem leggur sig alltaf allan fram í það sem hann er að gera og því hef ég engar áhyggjur af honum," sagði Wenger.