Shevchenko er gæludýrið hans Abramovich

Framherjinn Samuel Eto´o hjá Barcelona tekur undir skoðun þeirra fjölmörgu sem segja að Andriy Shevchenko hafi gert afdrifarík mistök með því að ganga til liðs við Chelsea í sumar.

"Ég á marga vini í herbúðum Chelsea og tala oft við þá," sagði Eto´o í samtali við vefsíðuna worldfootballers.com. Menn sjá Sheva sem gæludýrið hans Roman Abramovich (eiganda Chelsea) og hann fær ekki þá þjónustu sem hann þarf frá félögum sínum til að skora mörk - því liðið er svo varnarsinnað.

Hann hefði aldrei átt að fara frá Milan því þar er spiluð sóknarknattspyrna, en hjá Chelsea eiga framherjarnir erfitt uppdráttar vegna þess að liðið spilar svo stífan varnarleik," sagði Eto´o, sem líklega fer sjálfur ekki að skora mörk fyrir Barcelona fyrr en á nýju ári eftir að hafa meiðst á dögunum.