Það er mitt mál hvenær ég hætti

Sir Alex Ferguson lét fjölmiðlamenn heyra það á blaðamannafundi í dag þegar hann var spurður hvort hann ætlaði ekki að fara að hætta störfum í tilefni þess að á mánudag eru 20 ár liðin frá því hann tók við Manchester United.

"Ég vil einfaldlega halda áfram að vinna - svo einfalt er það. Ég hef gaman af vinnu minni og mér finnst það hneykslanlegt að sumir segi að ég eigi að hætta að vinna. Það kemur þessu liði andskotann ekkert við og ég hef fullan rétt á því að leggja hart að mér ef mér sýnist svo," sagði Ferguson argur.

"Sumir vilja einfaldlega ekki vinna og þeir sem nenna því ekki ættu að hafa vit á því að hætta að skipta sér að því hvað annað fólk er að gera. Við eigum erfiðan leik fyrir höndum á morgun og ég mun halda ótrauður áfram," sagði Skotinn skemmtilegi.