Lennon og Jenas ekki með gegn Hollendingum

Tottenham leikmennirnir Jermaine Jenas og Aaron Lennon hafa báðir dregið sig út úr landsliðshópi Englendinga sem mætir Hollendingum á miðvikudaginn vegna meiðsla. Lennon er meiddur á hné, en Kieran Richardson hjá Manchester United leysir Jenas af hólmi þar sem hann er meiddur á kálfa.

Áður höfðu þeir Gary Neville hjá Manchester United, Ledley King hjá Tottenham, Darren Bent hjá Charlton, Stewart Downing hjá Boro og Scott Parker hjá Newcastle allir dregið sig úr hópnum vegna meiðsla - og markvörðurinn Chris Kirkland verður ekki í hópnum þar sem kona hans á von á barni á næstu dögum.