Liverpool að landa ungum Argentínumanni

Fréttir frá Englandi í kvöld herma að Liverpool sé við það að ganga frá lánssamningi við unga bakvörðinn Emiliano Insua frá Boca Juniors í Argentínu. Insua þessi ku vera á Anfield í kvöld þegar Liverpool mætir PSV í Meistaradeildinni þar sem þessi 17 ára leikmaður mun fá stemminguna beint í æð.

Drög að samningi þessum voru teiknuð upp í október sl. en olli það nokkru fjaðrafoki í Argentínu þar sem menn þar á bæ eru orðnir þreyttir á að sjá unga og efnilega leikmenn keypta úr landi um leið og þeir sýna fram á getu sína. Boca hefur þegar samþykkt að selja kaupréttinn á öðrum efnilegum leikmanni í hendur kaupsýslumanna og þá er talið víst að félagið selji hinn efnilega Fernando Gago til Real Madrid í janúar.