Baulið eins og þið viljið

Framherjinn El Hadji-Diouf hjá Bolton segist fastlega búast við því að stuðningsmenn Arsenal muni baula á sig þegar Lundúnaliðið sækir Bolton heim í úrvalsdeildinni á morgun. Hann segist fagna því að baulað sé á sig, því stuðningsmenn bauli ekki á lélega leikmenn.

"Stuðningsmenn liða á Englandi baula aldrei á lélega leikmenn og því geta þeir baulað eins og þeir vilja á mig - það virkar aðeins hvetjandi á mig. Stuðningsmenn Arsenal vita að það er mjög erfitt að koma á heimavöll okkar og sækja stig og við vinnum alltaf ef við náum að halda hreinu. Okkur finnst bara gaman þegar lið eru að væla undan okkur, því okkur finnst betra að vinna á ljótan hátt en að spila fallega knattspyrnu og tapa," sagði Diouf, sem hefur helst verið í fréttum undanfarið fyrir vandræði sín utan vallar.