James íhugaði að raka af sér hárið

Markvörðurinn David James hjá Portsmouth segist hafa íhugað að raka af sér allt hárið á dögunum eftir að nýjasta hárgreiðslan hans varð miðpunktur athyglinnar í breskum fjölmiðlum um síðustu helgi. Hárgreiðslu James var líkt við vel smurða hárgreiðslu Ofurmennisins.

James hefur annars verið í fínu formi milli stanganna í vetur og vantar nú að halda hreinu í fjórum leikjum til viðbótar til að bæta met David Seaman hjá Arsenal, sem hélt hreinu 141 sinnum á sínum tíma. James hélt síðast hreinu gegn Liverpool á Anfield, en það var í fyrsta skipti sem James fær ekki á sig mark á Anfield gegn sínum gömlu félögum.