Nýtt upphaf fyrir Bellamy

Craig Bellamy gæti orðið eins og nýr leikmaður fyrir Liverpool eftir að hans persónulegu vandamál eru nú úr sögunni, að sögn Rafael Benitez, stjóra liðsins. Bellamy var hreinsaður af ákærum um líkamlegt ofbeldi í vikunni og hélt upp á áfangann með því að skora tvö mörk gegn Wigan í gær.

Benitez sagði eftir leikinn að Bellamy hefði litið einstaklega vel út á æfingum í vikunni og að greinlegt væri að þungu fargi væri af honum létt eftir að ákærur gagnvart honum voru felldar niður.

"Á fimmtudaginn var hann gríðarlega öflugur á skotæfingu og skoraði mikið af mörkum. Öll skotin hans rötuðu á markið. Ég einfaldlega gekk að honum og sagði: Ég vona að þú gerir þetta á laugardag. Og hann gerði það," sagði Benitez í gær.

Benitez segir að mörk Bellamy í gær muni reynast honum afar mikilvæg. "Hann þurfti á þessu að halda til að sýna fólki að hann er ennþá góður leikmaður. Í svona formi gæti hann orðið eins og nýr leikmaður fyrir okkur. Þegar hann spilar svona er hann martröð varnarmannsins," sagði Benitez jafnframt.