Eggert: Argentínumennirnir klára tímabilið hjá West Ham

Argentínumennirnir Carlos Tévez og Javier Mascherano munu ekki fara frá West Ham þegar félagsskiptaglugginn opnar í janúar. Þetta heldur Eggert Magnússon, stjórnarformaður West Ham, fram í viðtali við Sky Sports í dag.

Tévez þótti spila sinn besta leik fyrir West Ham gegn Everton í gær og hafði Eggert það á orði við Sky. "Hann sýndi okkur hvað í honum býr. Ég held að ég geti lofað ykkur að þeir verða hjá okkur út þetta tímabil. Þeir eiga ennþá eftir að sýna sitt rétta andlit og ég hlakka til að sjá þegar það gerist," sagði Eggert.

Spurður um framhaldið hjá tvímenningunum eftir þetta tímabil vildi Eggert lítið segja. "Það er ekki í okkar höndum þar sem við eigum ekki leikmennina. Við þurfum að ræða við þá fjárfesta sem eiga leikmennina með þau mál," sagði hann.