Telur sig betri en Eric Cantona

Vængmaðurinn Cristiano Ronaldo hefur góða trú á sjálfum sér sem knattspyrnumanni og í dag sagði hann í samtali við News of the World að hann væri betri en sjálfur Eric Cantona sem á sínum tíma spilaði í treyju númer 7 hjá Manchester United.

Menn á borð við Cantona, David Beckham, Bryan Robson og George Best hafa leikið í treyju númer 7 hjá Manchester United og Ronaldo segist vera búinn að setja sér ný markmið á ferlinum.

"Fyrst langaði mig að verða besti vængmaður í heiminum en nú stefni ég hærra. Ég vil vinna gullknöttinn og verða besti leikmaður í heimi. Ég á enn nokkuð í land með að verða bestur í heimi, en ég ætla mér að verða það einn daginn. Að mínu mati er Eric Cantona besta sjöan á eftir mér hjá Untied, en ég er aðeins 21 árs og ég vil ná miklu lengra," sagði Ronaldo, sem greinilega hefur góða trú á sjálfum sér - enda er Cantona almennt álitinn einn besti leikmaður sem klæðst hefur treyju Manchester United í sögu félagsins og leiddi liðið til margra titla á síðasta áratug.