Arsenal og Portsmouth skildu jöfn

Arsenal og Portsmouth skildu jöfn 2-2 í hörkuleik á Emirates vellinum í dag þar sem heimamenn lentu tveimur mörkum undir. Noe Pamarot kom Portsmouth yfir með skalla undir lok fyrri hálfleiks og Matt Taylor kom gestunum í 2-0 í upphafi þess síðari. Gilberto og Adebayor jöfnuðu metin svo með 2 mínútna millibili eftir klukkutíma leik. Freddie Ljungberg þurfti að fara meiddur af velli hjá Arsenal.

Reading tapaði 2-1 á heimavelli fyrir Blackburn. James Harper kom Reading yfir en þeir Benni McCarthy og David Bentley tryggðu Blackburn mikilvæg þrjú stig. Ívar Ingimarsson lék allan leikinn fyrir Reading en Brynjar Björn var varamaður og kom ekki við sögu í leiknum.

Newcastle lagði Watford 2-1 þar sem Obafemi Martins skoraði tvívegis fyrir Newcastle en mark Watford skoraði Hameur Bouazza.

Loks vann Sheffield United góðan sigur á Wigan á útivelli þar sem Rob Hulse skoraði sigurmarkið um miðbik leiksins.