Wenger óhress með fyrsta mark Portsmouth

Arsene Wenger fékk ekki að standa á hliðarlínunni í síðari hálfleik í dag þegar hans menn í Arsenal náðu aðeins 2-2 jafntefli gegn spræku liði Portsmouth. Wenger þótti fyrsta mark Portsmouth ansi blóðugt en hrósaði leikmönnum sínum fyrir að ná að jafna leikinn.

"Við þurftum að sýna að við værum sérstakt lið til að rífa okkur upp eftir að lenda 2-0 undir og við gerðum það og ég get ekki hrósað strákunum nóg fyrir það. Mér var vísað úr varamannaskýlinu í hálfleik eftir að ég mótmælti aukaspyrnunni sem gaf þeim fyrsta markið, en mér finnst við eiga skilið að vinna í dag af því við sköpuðum okkur svo mörg færi," sagði Wenger, sem missti Adebayor og Ljungberg í meiðsli og mun sá síðarnefndi missa af jólavertíðinni.