Milan staðfestir áhuga á Cassano

AC Milan á Ítalíu hefur boðist til þess að fá ítalska sóknarmanninn Antonio Cassano að láni frá Real Madrid fram á vor, með hugsanleg kaup í huga eftir tímabilið. Samkvæmt ítölskum fjölmiðlum eru forráðamenn Real jákvæðir fyrir slíkum samningi.

Cassano er í mikilli ónáð hjá forráðamönnum Real og vill ólmur losna þaðan sem fyrst. Leikmaðurinn vill helst snúa aftur til Ítalíu og að sögn fjölmiðla þar í landi er Cassano áhugasamur um að ganga til liðs við Milan.

Kaupverðið er sagt vera mun minna en áður var talið, eða tæpar fjórar milljónir punda. Það hlýtur að teljast vel sloppið fyrir leikmann í þeim gæðaflokki sem Cassano er í.