Á fermingarveisluna skjalfesta á vídeói

Friðrik Friðriksson leikari lék á als oddi í fermingarveislu sinni og var ekki eitt af þessu feimnu fermingarbörnum, að eigin sögn að minnsta kosti.

„Nei, nei. Ég var á þeytingi milli ættingja og ég á meira að segja alla veisluna á vídeói til að sanna hversu sprækur ég var," segir Friðrik. „Þetta var svona meðalstór veisla þannig að ég þekkti flesta ættingjana og það sparaði mér heilmikil vandræðalegheit."

Friðrik fékk marga góða gripi í fermingargjöf sem þrátt fyrir mikil gæði eru fæstir í notkun í dag. „Ég fékk svona Ikea-innréttingu í herbergið mitt sem ég tek enn þann dag í dag með mér hvert sem ég fer, hún er algjör draumur í dós," segir Friðrik og hlær. „Svo fékk ég líka gettóblaster. Reyndar hétu gettóblasterar ekki gettóblasterar á þessum tíma heldur kassettuspilarar. Þetta var sko enginn geislaspilari, svoleiðis lúxus var ekki kominn á markað."

Friðrik fékk líka mikið af útivistarbúnaði í fermingargjöf. „Það var vegna þess að ég var skáti, og er víst enn. Einu sinni skáti, ávallt skáti, maður kemst ekki undan því samkvæmt reglunum," segir Friðrik. „Svo fékk ég líka fullt af pening eins og gengur og gerist."

Ef Friðrik væri 13 ára í dag, en með þann þroska sem hann hefur tekið út nú, myndi hann án efa fermast aftur. „Maður græddi svo mikið á þessu að ég myndi hiklaust endurtaka leikinn. Þetta var svo mikil búbót og maður var skyndilega orðinn eignamaður 13 ára gamall," segir Friðrik og hlær. „Það er náttúrulega ákveðinn þroski að eiga fjárfestingar hingað og þangað."

Í öllu meiri alvöru játar Friðrik að honum finnist það í góðu lagi að krakkar fermist 13 ára þó svo þau séu ekki orðin trúarlega meðvituð. „Annað hvort verður fólk trúað eða ekki og annað hvort heldur það áfram að mæta í kirkju eða ekki," segir Friðrik.

„Ég held það fylgi enginn varanlegur skaði því að fermast og ef fólk skiptir um skoðun þá bara gerist það."-tg