Jón Ásgeir og Davíð í slag

Rithöfundurinn Óttar Martin Norðfjörð hefur sent frá sér nýja bók. Í bókinni segir frá afmælisveislu Jóns Ásgeirs Jóhannessonar athafnamanns.

„Bókin er um það þegar Jón Ásgeir heldur upp á afmælið sitt. Í sögunni fær hann Michael Jackson til að spila. Hann býður svo Davíð Oddssyni, Brad Pitt og fleira frægu fólki og brallar svo eitthvað með Kára Stefánssyni til að slá endanlega út allar fyrri veislur," segir Óttar Martin Norðfjörð sem var að gefa út sína fyrstu teiknimyndasögu, Jón Ásgeir og afmælisveislan.

„Hann ætlar að nota tækifærið og hefna sín á Davíð í veislunni en Davíð ætlar líka að gera það þannig að þetta verður eins og í Shakespeare-leikriti með tvær andstæðar fylkingar. Jón Ásgeir hefnir sín og Davíð hefnir sín á móti, svo endar þetta auðvitað á grand finale í lokin," segir Óttar.

„Kveikjan að bókinni voru allir þessir ríku karlar sem hafa verið að halda afmælisveislurnar sínar undanfarið og hvernig þeir virðast alltaf vera að reyna að toppa hver annan. Halda dýrari veislur og fá frægari skemmtikrafta. Út frá þessu fór ég að spá í hvernig það yrði eiginlega þegar Jón Ásgeir héldi upp á afmælið sitt en hann verður fertugur á næsta ári. Hann verður augljóslega að toppa alla hina."

Óttar hefur áður gefið út skáldsögu, ljóðabækur og tveggja blaðsíðna metsölu„bókina" Hannes - Nóttin er blá, mamma, um uppvaxtarár Hannesar Hólmsteins Gissurarsonar sem vakti mikla athygli fyrir síðustu jól.

Þetta er fyrsta teiknimyndasaga Óttars. „Ég datt niður á teiknimyndaformið þegar ég var að velta því fyrir mér hvernig væri best að koma sögunni frá mér. Það er svo auðvelt að nota teiknimyndir til að fara alla leið. Jón Ásgeir og pabbi hans búa til að mynda í kastala og eru með kórónur og Kári Stefánsson er orðinn brjálaður vísindamaður sem býr í geimstöð og er búinn að skapa alls konar óskapnað úr þekktu íslensku fólki. Eftir að hafa prófað mig áfram fann ég út að besta leiðin væri að klippa út hausinn af fólkinu og teikna svo restina."