Tesco býður í Dobbies

Breska stórmarkaðakeðjan Tesco, sú stærsta í Bretlandi, hefur gert yfirtökutilboð í skosku garðvörukeðjuna Dobbies Garden Centres. Tilboðið hljóðar upp á 155,6 milljónir punda, rúma 19,7 milljarða íslenskra króna. Gangi kaupin í gegn verða þetta fyrstu skref stórmarkaðarins utan matvörugeirans.

Markaður með garðvörur hvers konar hefur vaxið mikið í Bretlandi síðustu ár og veltir hann nú um fimm milljörðum punda, jafnvirði 635 milljörðum króna, á ári hverju. Terry Leahy, forstjóri Tesco, segir fyrirtækið horfa til þess að hagnast vel á kaupunum.

Breska dagblaðið Guardian hefur eftir breskum sérfræðingi í smásöluverslun að gangi kaupin á Dobbies í gegn verði þau hlutfallslega smá í sniðum fyrir stórmarkað á borð við Tesco. Jafngildi kaupverðið tekjum verslanakeðjunnar í tvo daga. Hann telur líklegt að viðskiptin marki fyrstu spor Tesco í frekari fyrirtækjakaupum utan matvörugeirans.

Guardin segir bresku umhverfissamtökin Friends of the Earth hins vegar ævareið. Þau segja innkomu Tesco í garðvörugeirann merki um að stórmarkaðurinn ætli sér aukin yfirráð í Bretlandi. Benda þau á að Tesco hafi þegar rúmlega þrjátíu prósenta markaðshlutdeild á breskum matvörumarkaði og stefni hraðbyri að því að ná ráðandi stöðu í fleiri geirum. Hefur blaðið eftir talsmanni samtakanna að kaupin muni vafalítið draga úr samkeppni á breskum garðvörumarkaði.

Dobbies rekur 21 verslun undir merkjum keðjunnar víðs vegar um Bretland og selur meðal annars moltukassa, sólpalla og ýmsar aðrar vörur fyrir garðinn.

Hluthafar Dobbies eiga þó enn eftir að samþykkja viðskiptin, sem hljóða upp á 1.500 pens á hlut.

Skoski auðmaðurinn Sir Tom Hunter jók um miðjan síðasta mánuð við hlut sinn í Dobbies úr rúmum sjö prósentum í 10,6 prósent. Hunter hefur fjárfest talsvert í garðvörugeiranum á undanförnum árum. Hunter er náinn viðskiptafélagi Baugs Group en fjárfestingafélag hans tók þátt í kaupunum á House of Fraser ásamt Baugi, FL Group og fleiri fjárfestum. Þá keypti það með Baugi og fleirum garðvörukeðjuna Wyevale Garden Centres í fyrra fyrir jafnvirði fjörutíu milljarða króna og Blooms of Bressingham var keypt á þessu ári.

Breskir fjölmiðlar segja mjög líklegt að Hunter safni saman hópi fjárfesta á næstunni og muni hann í kjölfarið gera gagntilboð í garðvörukeðjuna á móti Tesco.