Aldrei fleiri látist í einum mánuði í Írak en í desemer

Fleiri íraskir borgarar létust vegna ofbeldisverka í desember en í nokkrum öðrum mánuði frá því að landið var hernumið vorið 2003. Átök á milli trúarhópa í landinu eru höfuðorsök þessa mikla mannfalls.

Þetta kemur fram í samantekt íraska innanríkisráðuneytisins sem gefin var út í morgun. Þar segir að 1.930 saklausir borgarar hafi látið lífið vegna átaka í desember 2006, næstum því fjórum sinnum fleiri en í janúar sama ár. Alls týndu 12.320 Írakar lífi í ofbeldisverkum á árinu og það er eftirtektarvert að helmingur mannfallsins var á síðasta þriðjungi þess.

Flestir eru sammála um að mat ráðuneytisins sé mjög hóflegt, ekki eru þeir teknir með í reikninginn sem létust eftir að hafa verið fluttir særðir á sjúkrahús. Hver sem fjöldinn raunverulega er, er ljóst að mannfallið eykst stöðugt og vaxandi átök milli sjía og súnnía eru skýringin á stærstum hluta þess.

Óttast er að þau muni magnast enn frekar vegna aftökunnar á Saddam Hussein, fyrrverandi forseta landsins, og sérstaklega eftir að upptaka var birt þar sem sést þegar böðlarnir hæða hann og spotta. Íraska ríkisstjórnin hefur fyrirskipað rannsókn á hegðun þeirra, svo og hvernig þeim hafi tekist að mynda aftökuna þrátt fyrir fortakslaust bann við því.

Búist er við að á næstu dögum muni bandaríska ríkisstjórnin tilkynna um fjölgun hermanna í Írak til að stemma stigu við vaxandi ofbeldi þar. Líklegt er talið að aukaliðið muni einbeita sér að því að uppræta Mahdi-herdeildir Muqtada al-Sadr, eldklerksins frá Najaf, en þær eru sagðar bera ábyrgð á stórum hluta oftbeldisins.

140.000 bandarískir hermenn eru nú í Írak og á dögunum var greint frá því að mannfall úr þeirra röðum væri komið yfir þrjú þúsund manns. Nýleg könnun tímaritsins Military Times sýnir að aðeins 35 prósent Bandaríkjahers ánægð með stefnu Bush Bandaríkjaforseta í málefnum Íraks.