Risaslagur í beinni á Sýn í kvöld

Það verður sannkallaður risaslagur í beinni útsendingu Sýnar klukkan 1 í nótt þegar erkifjendurnir San Antonio Spurs og Dallas Mavericks eigast við í NBA deildinni. Liðin hafa mæst tvisvar í vetur og hvort lið hefur sigrað einu sinni. Þau áttust líka við í undanúrslitum Vesturdeildar síðasta vor þar sem Dallas hafði betur í sjö leikjum í einni bestu seríu úrslitakeppninnar.

Dallas hefur verið sjóðandi heitt undanfarið og hefur unnið 12 leiki í röð - og það í annað sinn á fyrstu tveimur mánuðum tímabilsins. Ekkert lið í sögu NBA hefur náð tveimur 12 leikja sigurgöngum svo snemma á tímabili, ef undan er skilið ótrúlegt lið LA Lakers frá 1972 - en það lið vann 33 leiki í röð það tímabil og er eitt besta körfuboltalið allra tíma.

Ekki hefur gengið jafn vel hjá San Antonio undanfarið og hefur liðið tapað fjórum af síðustu sjö leikjum sínum eftir að vinna níu af tíu í byrjun síðasta mánaðar. Auk þess hefur liðið verið að hiksta nokkuð á heimavelli sínum og hefur þegar tapað 5 af 17 leikjum sínum í San Antonio, sem er nokkuð skrítin þróun á þeim bænum.

Einvígi þessara liða í úrslitakeppninni síðasta vor var hreint út sagt frábær skemmtun, þar sem Dallas hafði naumlega betur 4-3 og sýndi gríðarlegan karakter. Sá karakter varð reyndar eftir í Dallas þegar í úrslitaeinvígið gegn Miami var komið, því þá spilaði liðið alls ekki jafn vel og fyrr í úrslitakeppninni.

Þegar talað er um liðin sem líklegust þykja til að hampa meistaratitlinum í sumar, eru Dallas og San Antonio almennt efst á blaði og því verður leikurinn í kvöld líklega góð upphitun fyrir það sem koma skal í vetur. Allt í beinni útsendingu á Sýn klukkan eitt eftir miðnætti.