Benitez hafnaði Real Madrid í sumar

Rafael Benitez hafnaði boði um að gerast þjálfari Real Madrid síðasta sumar en frá þessu greindi stjórnarformaður Liverpool, Rick Parry, í morgun. Parry segir að Benitez hafi hugsað málið vandlega en að lokum ákveðið að halda áfram því starfi sem hann hafði byrjað á Anfield.

“Þetta var sannkallað gylliboð og Rafa hafði klárlega áhuga þar sem Real Madrid er hans æskufélag. Þar hefur hann áður verið þjálfari og leikmaður,” sagði Parry en eftir að hafa sest niður með Benitez og rætt málin hafi hann náð að sannfæra spænska stjórann um að vera áfram.

“Við ræddum saman í nokkra klukkutíma um hvert Liverpool væri að stefna sem félag. Hann hafði trú á því sem við erum að gera hér hjá félaginu og vildi taka þátt í að leiða Liverpool til sigurs í ensku deildarkeppninni,” sagði Parry jafnframt.