Air France-KLM tvístígandi um Alitalia

Ekkert liggur fyrir hvort fransk hollenska flugfélagið Air France-KLM ætli að leggja fram yfirtökutilboð í ítalska flugfélagið Alitalia eða hafi fallið frá því. Alitalia er að mestu í eigu ítalska ríkisins. Fjölmiðlar í Evrópu reikna með að Air France-KLM hafi í hyggju að kaupa hlut í ítalska félaginu við einkavæðingu þess.

Talsmaður Air France-KLM hefur neitað að tjá sig við fjölmiðla um áætlanir flugfélagsins varðandi Alitalia, sem ítalska ríkið á 49,9 prósenta hlut í. Orðrómur hefur verið uppi um að flugfélagið ætli að boða til sérstaks hluthafafundar fyrir lok þessa mánaðar þar sem ákveðið verði hvort lagt verði fram tilboð í Alitalia.

Franska dagblaðið La Tribune segir verðið sem sett var upp fyrir Alitalia hafa verið of hátt auk þess sem skuldastaða þess væri svo slæm að Air France-KLM hefði hætt við frekari kauphugleiðingar á ítalska félaginu.

Krosseignarhald er á báðum flugfélögum og sat Jean-Cyril Spinetta, forstjóri Air France-KLM, í stjórn Alitalia allt fram til síðustu viku þegar hann sagði sig úr henni.

La Tribune segir að stjórn Air France-KLM hafi síður en svo hætt að horfa til Alitalia og geti svo farið að bréf verði keypt í félaginu verði það einkavætt.