Barcelona: Við höfum efni á Ronaldo

Ferran Soriano, varaforseti Barcelona, segir að félagið hafi vel efni á því að kaupa Portúgalann Cristiano Ronaldo frá Manchester United, ekkert sé því til fyrirstöðu ef þjálfarinn Frank Rijkaard hafi áhuga á því og ef verðmiðinn flokkist undir "almenna skynsemi."

Varaforsetinn segir það tæknilega spurningu hvort Katalóníustórveldið hafi áhuga á að kaupa Ronaldo, sem hefur líklega verið besti knattspyrnumaður Evrópu síðustu mánuði. "Þetta er tæknileg spurning sem liggur hjá þjálfurunum. Barcelona getur keypt hvaða leikmann sem er í fjárhagslegum skilningi - svo framarlega sem upphæðin er innan heilbrigðra marka," sagði Soriano.

Forráðamenn Barcelona hafa neitað því að hafa gert 30 milljón punda tilboð í Ronaldo og sömu sögu er að segja af meintu tilboði félagsins í Frank Lampard hjá Chelsea þar sem Portúgalinn Deco átti að hafa verið boðinn í skiptum.