Fólk eins og Victoria Beckham er að drepa fótboltann

Uli Hoeness, framkvæmdastjóri Bayern Munchen, segir að fólk eins og Victoria Beckham sé að ganga að knattspyrnunni dauðri. Hoeness segir að það sé konu David Beckham að kenna að einn af hæfileikaríkustu knattspyrnumönnum Evrópu sé nú að hverfa á braut.

Mikið hefur verið rætt um ákvörðun Beckham að fara til Bandaríkjanna í sumar í stað þess að finna sér nýtt lið í Evrópu, en í samtali við þýska blaðið Bild var Hoeness ekki í neinum vafa um það hver væri sökudólgurinn.

"Ég hef miklar mætur á David Beckham - en ekki konu hans. Það er fólk eins og hún sem er að drepa fótboltann og það er synd og skömm að Beckham sé að fara til Hollywood," sagði Hoeness, en talið er að Bayern hafi verið eitt þeirra liða sem höfðu augastað á honum eftir að ljóst varð að hann færi frá Real Madrid.