Það er orðið alþekkt að eftir því sem framleiðendur DVD og geisladiska búa til betri afritunarvarnir finna tölvuþrjótar leiðir til að komast í kringum þær. Nú er þegar kominn í umferð lykill sem fer framhjá afritunarvörnum á bæði Blue-Ray og HD-DVD diskum, öllum. Áður þurfti sérstakan lykil fyrir hvern einstakan Blue-Ray eða HD-DVD disk.
Blue-Ray og HD-DVD standa nú í harðri samkeppni um hvort sniðið vinni almenna hylli notenda en diskarnir eiga sameiginlegt að geta geymt mun meira gagnamagn en hefðbundnir DVD-diskar. Þegar er farið að gefa út tölvuleiki og bíómyndir í hárri upplausn, „high-definition" á svona diskum.
Sony hefur veðjað á Blue-Ray í nýjum Playstation 3 leikjatölvum sem líka geta spilað kvikmyndir á Blue-Ray diskum, á meðan Microsoft veðjar á HD-DVD diska í XBox 360 leikjatölvunum. Svo virðist sem Blue-Ray sé nú að vinna stríðið eftir að HD-DVD hafði lengi vel forystu og þá skiptir sköpum að Blue-Ray spilari er staðalbúnaður í PS3 tölvum á meðan kaupa þarf sérstaka viðbót við XBox 360 til að þær spili HD-DVD.
