Hagnaður Lego þrefaldast

Danski leikfangaframleiðandinn Lego skilaði hagnaði upp á 1,4 milljarða danskra króna fyrir skatt í fyrra. Þetta svarar til ríflega 16 milljarða íslenskra króna, sem er þrisvar sinnum betri afkoma en árið 2005.

Tekjur leikfangaframleiðandans námu 7,8 milljörðum danskra króna, um 91,5 milljörðum króna, sem er 10 prósenta hækkun á milli ára.

Lego hefur endurskipulagt rekstur fyrirtækisins og hefur meðal annars flutt mörg hundruð störf úr landi.

Jørgen Vig Knudstorp, forstjóri Lego, varar við því í samtali við danska viðskiptablaðið Börsen, að róðurinn verði erfiður á þessu ári og megi því gera ráð fyrir öllu slakari árangri nú en í fyrra. Gert er ráð fyrir að fyrirtækið skili 550 milljóna króna hagnaði á árinu, sem jafngildir um 6,5 milljörðum íslenskra króna.