Materazzi óánægður með Capello

Ítalski varnarmaðurinn Marco Materazzi hjá Inter Milan hefur gagnrýnt landa sinn Fabio Capello harðlega fyrir nýleg ummæli sín um ítalska knattspyrnu. Capello, sem nú stjórnar Real Madrid á Spáni, segir enga raunverulega samkeppni vera í ítölsku A-deildinni og því sé hún leiðinleg. Materazzi segir Capello vera að gera lítið úr sjálfum sér með ummælunum.

"Ég ber virðingu fyrir Capello vegna þess að hann er frábær þjálfari sem hefur unnið allt sem hægt er að vinna. En ég er ekki sammála öllu sem hann segir," sagði Materazzi við ítalska fjölmiðla, en sjálfur er hann þekktur fyrir að segja það sem honum dettur í hug og draga hvergi undan.

"Ég held að Capello hafi verið aðeins of fljótur á sér í þetta skiptið því ef ítalska deildin er svona léleg þá hlýtur hann að vera ofmetinn sem þjálfari, enda hefur hann unnið nánast alla sína titla sem þjálfari á Ítalíu."