Barcelona og Real Madrid kljást um 11 ára gutta

Laureano Ludena er 11 ára argentínskur sóknarmaður sem þykir einn efnilegasti leikmaður sem upp hefur komið í heimalandi sínu. Barcelona og Real Madrid eru nýjustu félögin sem bætast í slaginn um undirskrift Ludena, en áður höfðu öll stærstu lið Argentínu fengið hann á reynslu til sín. Fjölskylda leikmannsins segir hins vegar líklegast að hún muni flytja til Evrópu.

Luduena þessi spilar með lítt þekktu liði Pozo del Molle þar sem hann hefur farið á kostum með unglingaliði félagsins og skorað 160 mörk í 75 leikjum frá árinu 2005. Hann mun fara á reynslu til Barcelona, Real Madrid og Espanyol á næstu dögum en áður hefur hann verið við æfingar hjá River Plate og Boca Juniors í Argentínu.

"Við ætlum að fara til Spánar í 15 daga en síðan munum við snúa aftur heim og þá mun ég, í samráði við fjölskyldu mína, ákveða hvar ég muni spila. Ég er rólegur og einbeiti mér að því að vera í sem bestu formi þegar ég æfi hjá spænsku liðunum," segir Ludena.

Ramon Maddoni, þjálfari Boca Juniors, sem getur státað sig af því að hafa uppgötvað leikmenn á borð við Juan Roman Riquelme, Fernando Gago og Juan Pablo Sorin, hefur látið hafa eftir sér að hann hefi aldrei séð aðra eins hæfileika hjá leikmanni eins og í tilviki Ludena.