Minnesota - Dallas í beinni í kvöld

Leikur Minnesota Timberwolves og Dallas Mavericks verður sýndur beint á NBA TV sjónvarpsstöðinni klukkan eitt eftir miðnætti. Dallas er á ótrúlegri sigurgöngu og hefur unnið 12 síðustu leiki sína, en þó Minnesota hafi ekki gengið eins vel, stöðvaði liðið langa sigurgöngu Phoenix Suns í janúar og er því til alls líklegt.

Dallas hefur unnið 47 leiki í vetur og tapað aðeins 9 og er fyrir vikið með besta árangur allra liða í deildinni. Dirk Nowitzki er stigahæsti maður liðsins með 25,5 stig í leik og 9,5 fráköst.

Minnesota hefur unnið 26 leiki og tapað 30 og á í harðri samkeppni um sæti í úrslitakeppninni. Kevin Garnett er besti maður liðsins líkt og undanfarin ár og fer fyrir liðinu í nánast öllum tölfræðiþáttum. Hann skorar að meðaltali 22,7 stig, hirðir 12,8 fráköst, gefur 4,3 stoðsendingar, ver 1,7 skot og stelur 1,3 boltum í leik.