Golden State batt enda á sigurgöngu Dallas

Sautján leikja sigurgöngu Dallas Mavericks í NBA deildinni lauk í nótt þegar liðið steinlá á útivelli fyrir Golden State Warriors 117-100. Sigurganga Dallas var sú sjöunda besta í sögu deildarinnar og var tapið aðeins það þriðja hjá liðinu á síðustu þremur mánuðum.

Á meðan hvorki gekk né rak hjá liði Dallas í leiknum í gær fóru leikmenn Golden State á kostum og skoruðu fimm leikmenn liðsins 16 stig eða meira. Mickael Pietrus skoraði 20 stig fyrir Golden State, en Jason Terry og Devin Harris skoruðu 16 hvor fyrir Dallas.

Phoenix vann góðan heimasigur á Houston 103-82 þar sem "Brasilíska Þokan" Leandro Barbosa jafnaði persónulegt met sitt með 32 stigum fyrir Phoenix. Tracy McGrady skoraði 19 stig fyrir Houston en hitti aðeins úr 8 af 28 skotum sínum í leiknum. Þetta var 200. sigur Mike D´Antoni þjálfara Phoenix með liðið - en hann hélt upp á áfangann með því að láta henda sér út úr húsi með tvær tæknivillur í síðari hálfleiknum.

New Jersey batt enda á fimm leikja taphrinu með þvi að leggja slakt lið Memphis á útivelli 113-102. Vince Carter skoraði 30 stig og hirti 10 fráköst fyrir New Jersey, en Pau Gasol skoraði 19 stig fyrir Memphis.

Charlotte lagði Orlando 119-108. Derek Anderson skoraði 24 stig og gaf 10 stoðsendingar hjá Charlotte en Dwight Howard skoraði 26 stig og hirti 11 fráköst fyrir Orlando. Charlotte tryggði sér sigur í leiknum með tæplega 64% nýtingu úr þriggja stiga skotum sínum.

Toronto lagði Milwaukee á útivelli 108-93. Chris Bosh skoraði 25 stig og hirti 10 fráköst fyrir Toronto og T.J. Ford skoraði 19 stig og gaf 9 stoðsendingar gegn sínum gömlu félögum í Milwaukee, en Michael Redd skoraði 28 stig fyrir Milwaukee.

Leikur Seattle og Detroit verður sýndur beint á NBA TV sjónvarpsrásinni á Fjölvarpinu í kvöld og hefst hann klukkan tvö eftir miðnætti. Sjónvarpsstöðin Sýn verður svo með leik Milwaukee og San Antonio á dagskrá á föstudagskvöldið - en sá leikur verður spilaður kvöldið áður.