Barclays segist flytja höfuðstöðvar til Hollands

Breski bankinn Barclays ætlar að flytja höfuðstöðvar frá Bretlandi til Amsterdam í Hollandi gangi yfirtaka bankans á ABN Amro eftir. Þá hefur bankinn jafnframt sagt að ekki verði gerðar breytingar á æðstu stjórnendastöðum í ABN Amro, sem er stærsti banki Hollands.

Reiknað er með sameiningu bankanna verði til einn af stærstu bönkum Evrópu með markaðsverðmæti upp á 80 milljarða punda, 10.500 milljarða íslenskra króna. Hjá báðum bönkum eru 220.000 starfsmenn um allan heim og viðskiptavinir þeirra erum 47 milljónir talsins. Þá hefur komið til tals að skrá bankanna til jafns í bresku kauphöllinni í Lundúnum og í Amsterdam.

Bankarnir greindu frá því á þriðjudag að samrunaviðræður stæðu yfir.

Stjórnendur Barclays segja flutning á höfuðstöðvunum yfir Ermarsund liðka fyrir hugsanlegum samruna bankanna. Það muni hins vegar ekki hafa mikil áhrif á starfsemina í Bretlandi, að þeirra sögn.

Haft hefur verið eftir greinendum í bresku pressunni í vikunni að rekstur ABN Amro gangi illa og horfi mörg fjármálafyrirtæki til þess að kaupa bankann í heild sinni eða einingar innan hans. Á meðal þeirra sem hug hafa á kaupum í ABN Amro eru Royal Bank of Scotland, Capitalia á Ítalíu. Segja greinendur að stjórnendur Barclays horfi til þess með samrunanum að komast yfir starfsemi hollenska bankans í Asíu.