Dýrkeyptur sigur Gummersbach

Íslendingaliðið Gummersbach burstaði Melsungen 38-26 í þýska handboltanum í gærkvöldi. Guðjón Valur Sigurðsson skoraði 12 mörk og Róbert Gunnarsson 8. En sigurinn var Gummersbach dýrkeyptur. Franski landsliðsmaðurinn Daniel Narcisse fingurbrotnaði og spilar ekki næstu 6 vikurnar.

Gummersbach er í 3. sæti deildarinnar með 40 stig en Kiel er í 1. sæti með 44 stig og Hamborg í 2. sæti með 42. Guðjón Valur er í 3. sæti yfir markhæstu leikmenn með 154 mörk. Aðeins Kyung-Shin Yoon hjá Hamborg með 179 mörk og Kim Andersson hjá Kiel með 162 mörk, hafa skorað fleiri mörk en Guðjón Valur.