Fabregas: Tímabilið er klúður

Cesc Fabregas, hinn 19 ára gamli miðjumaður Arsenal, hefur viðurkennt að tímabilið í ár hafi verið klúður. Fabregas segir það óásættanlegt fyrir lið á borð við Arsenal að eiga ekki möguleika á neinum titlum á þessum tímapunkti leiktíðarinnar.

"Við munum ekki vinna neitt þetta tímabil og það er erfitt að sætta sig við það," segir Fabregas, en nokkrar vikur eru síðan Arsenal var slegið út úr Meistaradeildinni og báðum ensku bikarkeppnunum með stuttu millibili.

"Sérstaklega var sárt að tapa fyrir PSV í Meistaradeildinni. Við komumst alla leið í úrslit í fyrra og í ár hafði ég virkilega trú á að við gætum unnið keppnina. Það er erfitt að hugsa til þess að fyrir nokkrum vikum vorum við með á öllum vígstöðvum. En allt í einu vorum við dottnir út úr þeim öllum. Það eru mikil vonbrigði," segir Fabregas.