Lakers tapaði fyrir neðsta liðinu

Fjórir leikir voru í NBA deildinni í körfubolta í nótt. Dallas vann 21. leikinn í röð gegn New Orleans. Cleveland tryggði sér sæti í úrslitakeppninni og LA Lakers tapaði á heimavelli fyrir neðsta liði deildarinnar.

Dallas vann auðveldan sigur á New Orleans 105-89 á útivelli. Josh Howard skoraði 25 stig og hirti 10 fráköst fyrir Dallas en Jannero Pargo skoraði 22 fyrir New Orleans.

Cleveland lagði Indiana á útivelli 105-94. LeBron James skoraði 26 stig fyrir Cleveland en Jermaine O´Neal skoraði 32 stig fyrir Indiana.

Seattle vann ótrúlegan sigur á Minnesota á útivelli þar sem heimamenn höfðu 25 stiga forystu á kafla í síðari hálfleik. Rashard Lewis átti stórleik í síðari hálfleik og skoraði 35 stig í heildina hjá Seattle, en Ricky Davis var stigahæstur hjá Minnesota með 21 stig.

Loks tapaði LA Lakers á heimavelli fyrir neðsta liðinu Memphis 88-85. Kobe Bryant var stigahæstur hjá Lakers með 23 stig en hitti illa eins og allir félagar hans. Tarence Kinsey skoraði 24 stig fyrir Memphis og Rudy Gay 20.

Leikur New Jersey Nets og Indiana Pacers verður sýndur beint á NBA TV sjónvarpsstöðinni klukkan 23:30 í kvöld.