Essien tryggði Chelsea sæti í undanúrslitum

Miðjumaðurinn magnaði Michael Essien tryggði Chelsea 2-1 sigur á Valencia í síðari leik liðanna í 8-liða úrslitum Meistaradeildarinnar í kvöld og þar með sæti í undanúrslitum keppninnar. Fernando Morientes kom heimamönnum yfir í fyrri hálfleik en Andriy Shevchenko jafnaði í upphafi þess síðari. Það var svo Essien sem tryggði sigurinn með marki á 90. mínútu, en hann spilaði meiddur í kvöld.

Lið Valencia var sprækt í fyrri hálfleiknum og beitti skyndisóknum. Morientes átti skot í stöng og skömmu síðar skoraði hann laglegt mark og kom heimamönnum yfir þegar hann renndi boltanum yfir línuna eftir undirbúning Joaquin. Andriy Shevchenko jafnaði metin eftir aðeins sex mínútna leik í síðari hálfleiknum, en hann var eign Chelsea og gátu heimamenn þakkað það markverðinum Canizares. Þegar svo allt stefndi í framlengingu var það hinn magnaði Essien sem tryggði sigurinn með þrumuskoti úr þröngu færi hægramegin í teignum - sem Canizares hefði með öllu átt að verja.