Kahn sigursælasti leikmaður þýsku úrvalsdeildarinnar

Markvörðurinn Oliver Kahn náði tveimur glæsilegum áföngum þegar hann stóð í marki Bayern Munchen í 2-1 sigri liðsins á Leverkusen um helgina. Kahn lék þá sinn 400. leik fyrir meistarana og vann sinn 292. sigur í úrvalsdeildinni á ferlinum. Enginn leikmaður hefur oftar verið í sigurliði í sögu deildarinnar.

Kahn hefur spilað 528 leiki í efstu deild í Þýskalandi, en hann hóf ferilinn hjá Karlsruhe í heimabæ sínum. Kahn fór um helgina upp fyrir Manfred Kaltz í sigurleikjum í deildinni, en sá lék með HSV á sínum tíma. Fyrrum Bayern-leikmennirnir Lothar Matthaeus og Sepp Maier eru jafnir í þriðja sæti listans með 249 sigurleiki á ferlinum - Mattheaus þó úr nokkuð færri leikjum.