Vilja að aftökum verði hætt í Írak

Mannréttindasamtökin Amnesty International hafa kallað eftir því að aftökum í Írak verði hætt og hvetja bæði bandaríska og breska herinn til að afhenda írökskum stjórnvöldum ekki menn sem dæmdir hafa verið til dauða í landinu.

Samtökin benda á að Írak sé nú í fjórða sæti yfir þau lönd þar sem flestar aftökur fara fram, en aðeins Kína, Pakistan og Íran taka fleiri af lífi á ári hverju. 270 manns hafa fengið dauðadóm í Írak frá miðju ári 2004 og hafa 100 þeirra verið teknir af lífi eftir því sem segir í skýrslu Amnesty. Þar af voru 65 teknir af lífi í fyrra en í þeirra hópi var Saddam Hussein, fyrrverandi forseti Íraks.

Benda mannréttindasamtökin enn fremur á að dauðarefsingar hafi engu skilað í landinu því uppreisnarmenn hafi sig nú í frammi sem aldrei fyrr. Þá segja samtökin að fjölmargir fangar hafi ekki fengið sanngjarna málsmeðferð fyrir rétti og að játningar sumra hafi verið knúðar fram með pyntingum.